Tumbuna stori

 

Sukundumi i lusim haustambaran

 

Bipo bipo tru long taim bilong ol tumbuna long yar 2011 i bin gat wanpela bikapela masalai nem bilong em Sukundumi. Em i save bosim haustambaran bilong ol lain Papua Niugini. Hamas taim ol lain i traim long rausim em, em i save strong na stap.

Olgeta ol samtin bilong ol pipol em I bin bosim na stap na ol lain les stret long em. Em tu em olsem bigman long wei bilong em yet na planti lain ol sapotim em na stap. Olsem na ol man meri giv-up na stap isi. Wan-wan tasol ol bigmaus na kros-pait wantaim ol lain bilong em.

Igo na wanpela dei ol i bin putim Sukundumi long kot. Olgeta lain i hamamas taim ol harim dispela nius. Long dispela kot ol waitman i bin kam long ovasis long skelim ol stori. Sukundumi em i no wari. Em save olsem em ino bin wokim wanpla rong. Em strongim kona bilong em na karim ol save man long halivim em long winim kot. Em I bin winim kot na kot I tokim em olsem em bai no inap wok long tupela wik olsem panismen bilong em. Olgeta lain bilong em i bin hamamas stret na ol paitim bros na pati na stap.

Tasol wanpela samtin I bin kamap long taim bilong kot. Long fespela dei bilong kot Sukundumi i klostu ai-raun insait long kothaus. Olgeta lain I bin poret stret na painim six-holes stap long insait. Masalai ya em i bin gat bikpela hevi tasol bihain ol lain bilong em tok em I liklik samtin.

So taim kot i pisin Masalai em kalap long balus na em i go ovasis long kantri bilong ol kongkong ol i kolim Singapore. Long hap yet em i go admit long bikpela hausik na ol dokta I sekim em. Planti lain long Papua Niugini ol faul long wanem as Sukundumi i go long hausik. Ol lain bilong em I bin tok, "em normal yah wari be lasi." Samtin, ol tok em save kam sekim em yet stap olgeta taim so ol lain tingting tumas.

Ol tok olsem na nogat, wanpela niusman bilong Australia i tok olsem Sukundumi bai igat bikpela operesen long hausik long Singapore. Taim Sukundumi harim dispela em belhat stret na em ringim ol lain long Kundu2 TV na toktok olsem "mi stap stap orait, orait tasol, noken tingting tumas long mi."

Ol lain harim dispel na ol stap isi tasol. Tasol bihain ken, ol lain long hauslotu kisim toksave long pater long prei bikos Masalai bai go long bikpela operesen. Dispela mekim ol lain tingting planti ken na kainkain stori wok long pairap long olgeta hap kona long kantri. Ol lain bilong Sukundumi i kam aut ken na tokim ol lain long stap isi.

Igo na, wanpela dei,mangi bilong bipo Bigman bilong Wabag, Tei Abal, i toksave long haustambaran olsem Masalai I kisim bikpela hevi tumas long lewa bilong em. Mangi yah nem bilong em Sam na Masalai i bin wokim em bos bilong kantri na lusim em long lukautim hausman.

Sam em olsem bigman long wei bilong em yet tasol ol narapela brata bilong em nogat luksave long em. Kain olsem, em i no wanpela boi bilong grup na respect i no stap. Em i no kaksi olsem Don na Patrick, tupela original bik'la mangi b'lo grup. Olsem na taim ol boi blo grup harim olsem papa em kisim bikpela hevi na silip stap long hausik ol plen stap long kisim pawa long han bilong Sam.

Wanpela samtin i wok long kamap klia nau em olsem Sukundumi i no inap kambek long pawa ken. I luk olsem em i kisim bikpela bakarap long lewa bilong em na lewa I no wok gut. Em tu em lupun pinis na kain bakarap save kamap long lewa ol I no isi tumas long ol dokta long stretim.

Mama Lo bilong kantri I tok olsem sapos praiminista i no stap long gutpela helt Haustambaran i mas votim niupela praiminista.

Dispela senis em makim taim bilong niupela generesen bilong Papua Nuigini na pinis bilong wok bilong ol papa bilong indipedens. Na long yar 2012 ol biglain bilong ples bai makim ol niupela lida long go skelim pik gris long haustambaran. Husait ol trupela lida bilong niupela generesen bai kisim ples bilong Sukundumi -papa bilong indipendens.